Dorffasnacht Dittingen 2013

Plakette Fasnacht Dittingen

DSDS lautete das Motto der diesjährigen Dorffasnacht und stand für DITTINGEN SUCHT DEN SUPERSTAR!

Viele Stars kamen dieser Einladung nach. Bunt gemischt wie eine Fasnacht sein sollte kamen sie daher und gaben Ihre Performances zum Besten. Die Stars wurden von ihren privaten Bodyguards beschützt und von ihrer grossen Fangemeinschaft gefeiert.

Unser Lehrer Florian Mangold hat all diese bunten Eindrücke und narrigen Erlebnisse in einem Gedicht wiedergegeben:

Mit wisser Kaputze und wissem Gwand,
E Ding zum Lärme in dr Hand,
Mir laufe durchs Dorf uf de Strosse,
Dien Pfannedeckel lut zämmestosse,
Drmit dr Winter kapiert,
Er wird do nümm toleriert.

Wider im Warme, im alte Bad,
Gits heissi Mählsuppe, gar nid fad,
Doch nur wenigi Kinder hän drvo gnoh,
Dr Gschmack drfür hän sie nonig überkoh.
Verkleidet kömme sie denn in d Schuel,
Waggis und Häxe sitze ufem Stuehl.

Für am Umzug, am Nommitag frieh,
Gän sich alli ganz grossi Mieh,
Do s Motto ‚Dittingen sucht den Superstar‘ heisst,
Sind vieli bekannti Lüt aagreist,
Dangge au an die kleini Clique wo isch koh,
Zum zämme mit de Schieler in d Reihe yyzstoh.

Und los gohts trummle, pfyffe und marschiere,
D Stars dien lächle, winke und posiere,
D Volksmusiksfraktion us de Zillertaler Alpe,
Duet hinter dr Lady Gaga und ihrne Beschützer tschalpe,
Vor dr Lady Gaga hüpft, do bisch baff,
D Pipi Langstrumpf, sammt Pfärd und Aff.

Bim Maskeball nachem Umzug im bad
Seit d Jury ihri Meinig über jede Kandidat,
Sie lobt d Pipi und dr Tanz vo de Affe in de höchschte Tön,
Au s Lied und dr Tanz vo dr Volksmusik sigi wunderschön,
Begeischtere duet d Lady Gaga, nüt het se gstört,
Au nur dangg ihrne Bodyguards, het me ghört.

D Schnitzelbängg, vo de Kinder dichtet,
Hän sich gege d’Lehrer grichtet,
Mit viel Witz und de richtige Wort,
Hän sie troffe die schmärzende Ort,
Und mit viel Lache und viel Freud, ob Maa oder Frau,
Hämmer gseh, d Kinder kenne uns genau.

Das wärs gsi, vo dr Schuelfasnacht isch brichtet,
Nur no eins: me heigi no dr Elvis gsichtet,
Wie er uf dr Bühni s Tanzbei schwingt,
Aber ich has Gfühl die Story stinggt,
Z letscht an Smarties, an d Hälfer und an d Gäscht,
Dangge für e Ysatz, Dangge Ihr sind die Bescht!

Fasnacht23

Foto: Gaby Asprion

Mehr Bilder findet Ihr unter Bildgalerie auf der Smarties Webseite
www.smarties-dittingen.ch